في ناس بتفكر لمن الحرب تقيف برجع بيتنا وتشتغل عادي خليك فاكر ما كل الناس ممكن ترجع زي اول بترجع لكن بأفكار ونفسيات جديدة وانت زاتك ما ح تكون نفسك انت!. في بعض الناس ممكن ترجع بعد الحرب بتكون مقبله علي الحياة لكن في خاطرها اشياء من الماضي الاليم مرات الحرب فيها حاجات بتكدر عليك حياتك حاول اتعامل مع المواقف بالعقلانية. خت في بالك عادي ممكن تقابل زول ما يسلم عليكم او ما يعرفك لانو حصل تغير في شكلك وملامحك ما تقول الزول مفتري مطنشك اعرف بس الزول دا قلبو مكسور.لمن تلاقي زول ضعيف مشيب لونوا اتغير ما تسألوا ليه تغيرت كدا ما لك بيهو!! ما تزيد هموموا عليهو اعرف قلبه مكسور. في زول تاني قلبو اتكسر لانو كل دقيقة بتذكر مشهد ما ببارح خيالو لحظة اغتصاب امو اختو بناتو هو كان لاحوله ولا قوة له في مراره أكتر من كدا وتفضل تلعن نفسك والجبان الما خلاك تموت من أجل أسرتك. الزول لمن يرجع البيت ما يندم على شقى عمره وتعب سنين ضاع في رمشت عين وابعدوك ياحنين حقو تحمد ربك انك لسه عايش. لمن تمشي في الشارع بتحس بنفسك غريب لانو كل الناس البتعرفهم سافرو بعيد وأصدقاء ما رجعوا ما معروف رجوعهم متين. اصعب حالات القلب المكسور لمن ما تعرف زولك ميت ولا حي ياربي يكون وين مصيرو شنو.
انا بحس حالة القلب المكسور أشبه بكسر العظام مافي فرق نفس الالم والأعراض.المشكلة تفحص ما في أي مرض عضوي لانو الفحوصات والاشعه بتكشف الحاجات الظاهرة في الجسم لكن في حاجات عميقه زي الألم الروحي.
في ناس الحياة مسخت عليهم كل ما تذكر ضحكت الاخوان الاهل واللمه صينة الغداء.لمن تدخل أوضة ابوك الاتوفى تبكي بحرقه دا نوع من القلب.
لمن تصحصح من العملية تلقى جزء من أعضاءك مبتور محتاج زمن عشان تتقبل نفسك تعيش حياتك بقلب مكسور جناح.
في ناس عندهم مشاريع خضرت وبدت الدنيا تضحك ليهم فأجأة تتلاشي الأحلام.مرات الزول بكون في صراع داير تتغير وترضى بقسمتك لكن في صوت جواك بصحي فيك الألم.في ناس من الضغوط بقت بتنسى أي حاجة حلوه بكون في صوره مسيطرة هي صورة القلب المكسور. عشان كدا لمن تلاقي زول اتغير منك اتعامل معاهو بفهم لانو قلبو مكسور. ياريت ما تلوم زول على حاجة فتش ليهو اعزر أكيد قلبو مكسور.قدموا المحبه علي القسوة والصفح علي العتاب.لو ظهرت اعراض القلب المكسور حاول اتصل علينا عندنا خدمة نفسية مجانا._٠٩١٢١٨٠٤٨٤ ٠١٢٣٧١٥٧٠٠
كانت مبادرة في زمن الحرب
امراض نفسية بعد الحرب!!!!. د. احمد بشير الألفي .. يكتب “مذكرات من داخل العيادة النفسية”
