نص البيان بسم الله الرحمن الرحيم
أسر معتقلي ولاية شرق دارفور
بيان عن فك سراح المعتقلين بسجن دقريس من غير شروط
نحن أسر المعتقلين بولاية شرق دارفور في محليات أبو جابرة الفردوس عسلاية بحر العرب والضعين نوجّه هذا البيان مباشرة إلى قادة قوات الدعم السريع ونطالب بالإفراج الفوري وغير المشروط عن جميع معتقلينا بسجن دقريس دون أي تأخير أو تسويف
الحصل دا ما حادث عادي ولا خطأ فردي دي اعتقالات تعسفية واضحة والاستهداف فيها مقصود وموجّه لأنو كل المعتقلين من دار الرزيقات البقارة بشرق دارفور وما في أي اعتقال للرزيقات الأبالة في شمال دارفور ولا جنوب دارفور ولا غرب دارفور ولا وسط دارفور
ولو الاعتقال بسبب أو جريرة بحجة فلول وكيزان نؤكد وبكل وضوح إنو كل الولايات المذكورة فيها قيادات فلول وكيزان ومع ذلك لم يتم اعتقالهم والسؤال البسيط والواضح ليه البقارة بس شرق دارفور
الظلم دا قدام الناس وما في زول يقدر ينكره دا فرز قبلي وانتقائية فاضحة ومحاولة لكسر إرادة ناس بعينهم لكن نقولها صريحة الزمن دا غير الزمن والصمت انتهى والخوف ما عاد خيار
ونقول بكل وضوح إن أسر المعتقلين ظلماً بسجن دقريس قد تحسّسوا حجم الظلم الواقع عليهم وكل الأسر اليوم في أهبة الاستعداد لمواجهة أي ظلم أو قهر أو إجراءات روتينية جائرة تُفرض على المساكين
دا موقف واعي وصبر بلغ مداه وإصرار على عدم القبول بالإذلال أو التطبيع مع الظلم لأن الكرامة ما بتتجزأ والظلم مهما طال مصيره السقوط
نحن ما طالبين امتياز ولا مجاملة مطلبنا حق بسيط وواضح
الإفراج الفوري وغير المشروط عن جميع المعتقلين
وقف سياسة الاعتقال على أساس الانتماء القبلي
احترام حقوق المواطنين بدون تمييز
*نحمّلكم كامل المسؤولية السياسية والأخلاقية عن الحاصل داخل سجن دقريس ونحذركم من استمرار سياسة الاستهداف القبلي لأن النار لو اشتعلت ما بتحرق جهة واحدة
وفي حال عدم الاستجابة لمطالبنا العادلة نعلن بوضوح إنو الخيارات أمامنا مفتوحة وسنستخدم كل الوسائل المشروعة لكشف هذا الظلم ووضع حد له داخلياً وخارجياً
هذا بيان موقف وليس رجاء
والرسالة وصلت
ونقولها صريحة وما بنلف ولا بندور النهج الداير تمارسوه دا ما بعيد من نهج الفلول حتى لو اتغطى بشعارات جديدة نحن ما وقفنا مع الثورة عشان يتبدل الزي ويتغير الاسم ويستمر نفس الظلم الثورة قامت عشان العدالة والحق والمساواة ما عشان الاعتقال والفرز القبلي والقهر ومن يفتكر القسوة بتكسر الناس يكون غلطان لأنو الناس دي كسرت حاجز الخوف من زمان والتاريخ قدامنا واضح أي جهة تمشي في سكة الفلول نهايتها واحدة مهما طال الزمن.
*محليات أبو جابرة عسلاية الفردوس بحر العرب الضعين وضواحيها*
